«Бавария» ҳужумчиси Харри Кейн Германия Кубоги финалида «Штутгарт»га қарши ўйинда (3:0) хет-трик қайд этди.
32 ёшли инглиз футболчиси 2025/26 йилги мавсумнинг 51 та учрашувида 61-голини урди. Унинг ҳисобида Германия чемпионатида 36 та, мамлакат кубогида 10 та, Чемпионлар лигасида 14 та ва Германия Суперкубогида 1 та гол мавжуд.
Бу Кейннинг фаолиятидаги энг яхши натижадир. Бунгача бўлган рекорд 2023/24 йилги — «Бавария»даги дебют мавсумида киритилган 44 та гол эди. Умумий ҳисобда Кейн мюнхенликлар сафида 147 та ўйинда майдонга тушиб, 146 та гол урди ва 33 та голли узатмани амалга оширди.
