Миланнинг «Интер» клуби «Барселона» билан беқарор мавсумни ўтказган ва жамоадаги келажаги номаълум бўлиб турган уругвайлик ҳимоячи Рональд Араухога қизиқиш билдираётгани ҳақида аввалроқ хабар берилган эди. Бироқ Араухонинг трансфери «Интер» учун молиявий жиҳатдан имконсиз бўлиб чиқди.
Италиянинг Corriere della Sera нашри хабарига кўра, «Барса» 27 ёшли ҳимоячи учун 50 миллион евро талаб қилмоқда. Бу «Интер» учун жуда катта маблағ ҳисобланади, айниқса жамоанинг Чемпионлар лигасини эрта тарк этгани клуб бюджетига сезиларли зарба берган бир пайтда.
Ваҳоланки, миланликлар яқинда ўз тарихида 21-бор Италия чемпионига айланган эди. Шундай қилиб, Араухонинг Миланга келиши амримаҳол.
