Роберто Де Дзерби келгуси мавсумда ҳам «Тоттенхэм» бош мураббийи сифатида қолиш ниятида эканини тасдиқлади.

Айни пайтда «шпорлар» АПЛ турнир жадвалида 17-ўринда бормоқда ва уларни Чемпионшипга тушиб кетиш зонасидан атиги 2 очко ажратиб турибди. Бугун Лондон клуби Премьер-лиганинг 38-тури доирасида «Эвертон»ни қабул қилади. Учрашув Тошкент вақти билан соат 20:00 да бошланади.

«Ҳа, мен ҳаммасини тасдиқлайман. «Тоттенхэм» мураббийи бўлиш мен учун ҳамон катта шараф. Ҳатто жойимизни сақлаб қолиш учун курашаётган бўлсак ҳам, бу муаммо эмас. Мен футболни турнир жадвали ёки ўйин даражасидан ҳам юқорироқ нарса деб биламан. Шубҳасиз, ҳар биримиз «Тоттенхэм»нинг келажаги учун ўйнаймиз.

Мен бу ерга жамоа турнир жадвалининг ўртасида бўлмаганида келгандим. Вазият шундай эди ва мен бу ерга келган эканман, демак, мақсадга эришиш учун етарли шароитлар, муносиб футболчилар ва имкониятлар борлигига ишонганман. Кейинчалик вазият ўзгарди, чунки биз Кути Ромеро, Хави Симонс ва Доминик Соланкени йўқотдик, аммо менинг қўл остимда жамоа саккиз очко тўплади ва эҳтимол, ундан ҳам кўпроғига лойиқ эдик.

Биз яхши ўйнаяпмиз. Премьер-лигада қолишга лойиқмиз, аммо яна бир қадам ташлашимиз керак. Бу жуда қийин қадам, лекин имкони бор. Ғалаба қозониш учун керакли барча нарсага эгамиз. Биз ҳамон ўз олдимизга қўйган мақсад учун курашяпмиз. Биз тайёр ва кучли бўлишимиз керак», — деди Де Дзерби.