Франциянинг «Пари Сен-Жермен» клуби УЕФА Чемпионлар лигаси финалида Лондоннинг «Арсенал» жамоасига қарши ўйинга тайёргарликни давом эттирмоқда. Учрашув 30 май куни Будапештда бўлиб ўтади.
Ҳал қилувчи баҳсга бир ҳафта қолганида, жамоа Пуассидаги базада мухлислар ва академия тарбияланувчилари иштирокида ички назорат учрашувини ўтказди. L’Equipe нашрининг қайд этишича, ўйин икки бўлимдан (ҳар бири 20 дақиқа) иборат бўлиб, расмий учрашувга имкон қадар яқин шароитда ташкил этилди.
Майдонда аввалроқ «Париж»га қарши ўйиндан кейин авайлаб келинаётган Нуну Мендеш ва Вильян Пачо ҳам кўриниш берди.
Бироқ, Усмон Дембеле ва Ашраф Ҳакимий умумий гуруҳга қўшилишмади:
-
Ашраф Ҳакимий: Чемпионлар лигаси ярим финалида «Бавария»га қарши ўйинда олган сон мушаги жароҳатидан тикланмоқда. Ҳимоячи якка тартибда шуғулланди. Унинг тўлиқ машғулотларга қайтиши яқин кунларда кутилмоқда, бироқ финалга қадар оптимал формага кириш учун вақт кам қолган.
-
Усмон Дембеле: «Париж»га қарши ўйиндан сўнг болдир мушагида оғриқ сезган. Вазият бироз оптимистикроқ кўринади — футболчи ва унинг атрофидагилар Дембеле Будапештда асосий таркибда майдонга тушишига ишонч билдиришмоқда.
Жамоа учун икки кунлик дам олишдан сўнг, сешанба куни ўтказиладиган машғулот ҳал қилувчи аҳамиятга эга бўлади.
