Москванинг “Спартак” жамоаси футболчилари Россия Кубоги суперфиналидаги ғалабани нишонлаш вақтида мусобақанинг биллур кубогини синдириб қўйишди.

Ҳал қилувчи баҳсда москваликлар “Краснодар” жамоасини пенальтилар сериясида (асосий вақт — 1:1, пенальтилар бўйича — 4:3) мағлуб этиб, чемпионликни қўлга киритди. Бироқ қувончни нишонлаш жараёни кутилмаган воқеа билан якунланди.

Қайд этилишича, ғалаба тантанаси вақтида “қизил-оқлар” анъанага кўра соврин ичига шампан виноси қуйиб ичишга уринишган. Шундан сўнг, жамоа футболчиси Пабло Солари биллур кубокни бошидан баланд кўтарганида, дастлаб унинг қопқоғи учиб кетган, кейин эса пастки қисми синиб тушган.

Ўйиндан кейин “Спартак” ўзининг Telegram каналида кубокнинг фақатгина металл қисми ва ерда ётган биллур парчалари суратини эълон қилди.

“Дўстлар, дахшатли хабар. Биз кубокни синдириб қўйдик. Барчаси яхшиликка бўлса керак?”, дейилади клуб қолдирган хабарда.

Қизиғи шундаки, москваликлар жамоаси синган кубок парчаларини шунчаки ташлаб юбормоқчи эмас. “Спартак” матбуот хизмати кубок синиқларидан бирини тасодифий мухлисга тақдим этиш учун махсус ютуқли ўйин бошланганини эълон қилди.

Маълумот учун, “Спартак” ўз тарихида бешинчи бор Россия Кубогини қўлга киритди. Жамоа охирги марта ушбу турнирда 2022-йили зафар қучганди.