Енгил вазн тоифасида мағлубиятсиз келаётган чемпион Илия Топурия навбатдаги унвон ҳимояси учун 70 кг вазн рейтингида иккинчи рақамли жангчи бўлиб турган Арман Царукянга қарши жанг қилишдан манфаатдор.
ESPN мухбири Карлос Легаспининг хабар беришича, бу жанг Оқ уйда бўлиб ўтадиган UFC турниридаги Жастин Гэтжи билан тўқнашувдан сўнг амалга ошиши мумкин.
«У ҳақиқатан ҳам Арман билан жанг қилишни хоҳлаяпти. Агар битта ҳимоя жангини ўтказса, ундан кейинги рақиби айнан Арман бўлишини истайди. Бу босқичда бу жангни инкор қилишнинг иложи бўлмай қолади.
Менимча, агар Илия ғалаба қозонса, навбатдаги камар ҳимояси Арман Царукянга қарши бўлади, кейин эса воқеалар ривожини кутамиз. Чунки унда Ислом Махачев билан жанг қилиш амбицияси ҳам бор», — дея Легаспининг сўзларидан иқтибос келтирмоқда Championship Rounds саҳифаси.
