«Челси» ҳужумчиси Эстевао жиддий жароҳатдан сўнг тикланиш жараёнини давом эттирмоқда. Ушбу жароҳат сабабли у Жаҳон чемпионатида иштирок эта олмайдиган бўлди.
Sport Witness нашрининг хабарига кўра, бразилиялик футболчининг реабилитацияси яхши кетмоқда. Ҳозирда унинг август ойи бошида умумий гуруҳ машғулотларига қайтиши кутилмоқда. Катта эҳтимол билан, ҳужумчи «кўклар»нинг мавсумолди тайёргарлигини ва АПЛ-2026/27 мавсумининг дастлабки ўйинларини ўтказиб юборади.
Эслатиб ўтамиз, Эстевао апрель ойида «Манчестер Юнайтед»га қарши кечган Англия чемпионати ўйинида тизза ости пайларининг тўртинчи даражали йиртилиши жароҳатини олган эди.
2025/26 йилги мавсумда бразилиялик футболчи Лондон клуби сафида барча мусобақаларда 36 та ўйинда майдонга тушиб, 8 та гол ва 4 та голли узатмани ўз ҳисобига ёздириб қўйган.
