«Chelsi» hujumchisi Estevao jiddiy jarohatdan so‘ng tiklanish jarayonini davom ettirmoqda. Ushbu jarohat sababli u Jahon chempionatida ishtirok eta olmaydigan bo‘ldi.
Sport Witness nashrining xabariga ko‘ra, braziliyalik futbolchining reabilitasiyasi yaxshi ketmoqda. Hozirda uning avgust oyi boshida umumiy guruh mashg‘ulotlariga qaytishi kutilmoqda. Katta ehtimol bilan, hujumchi «ko‘klar»ning mavsumoldi tayyorgarligini va APL-2026/27 mavsumining dastlabki o‘yinlarini o‘tkazib yuboradi.
Eslatib o‘tamiz, Estevao aprel oyida «Manchester Yunayted»ga qarshi kechgan Angliya chempionati o‘yinida tizza osti paylarining to‘rtinchi darajali yirtilishi jarohatini olgan edi.
2025/26 yilgi mavsumda braziliyalik futbolchi London klubi safida barcha musobaqalarda 36 ta o‘yinda maydonga tushib, 8 ta gol va 4 ta golli uzatmani o‘z hisobiga yozdirib qo‘ygan.
