«Кристал Пэлас»нинг франциялик ҳужумчиси Жан-Филипп Матета жамоасининг Конференциялар лигасидаги ғалабасидан сўнг ўз фикрларини билдирди. Испаниянинг «Райо Вальекано» жамоасига қарши кечган учрашув 1:0 ҳисобида якунланди ва айнан Матета ягона гол муаллифига айланди.
«Ўзимни ажойиб ҳис қиляпман! Ажойиб! Биз буни уддаладик! Европадаги илк тажрибадаёқ биз бунга эришдик. Энди шунчаки байрам қилмоқчиман. Бу йигит [ўтган мавсумгача 13 йил давомида клубда тўп сурган Жоэл Уорд] ҳам биз билан бирга нишонлаши керак», — деди Матета TNT Sports нашрига берган интервьюсида.
«Биз бор кучимизни бердик. Сизларга уларнинг ўйин интенсивлиги қандай бўлишини айтгандим, ҳозир эса жуда чарчаганман — ўзимни тўлиқ бағишладим. Бугун айнан шунинг учун ҳам ғалаба қозондик».
«Мен ҳар доим мухлислар билан биргаман. Улар мени футболчи сифатида жуда кучли қўллаб-қувватлашди. Улар ҳамиша ортимизда туришади. Биз бу ғалабани улар учун ҳам қўлга киритдик».
Бу соврин жамоанинг 120 йиллик тарихидаги илк еврокубок муваффақияти ҳисобланади. Бир йил аввал «бургутлар» Англия кубоги ва Суперкубогини ҳам қўлга киритишга муваффақ бўлган эди.
