«Реал Сосьедад» ёзда ўз дарвозабони Алекс Ремирони сотишга тайёр. Бу ҳақда Mundo Deportivo хабар бермоқда. 2027 йилгача амал қиладиган шартномага эга 31 ёшли посбон клуб раҳбариятига жамоани ўзгартириш истаги борлигини билдирган. Агар клубга 8–10 миллион евро атрофида таклиф тушса, улар футболчини қўйиб юборишга тайёр.

Ремиро «Барселона»нинг эътибор марказида қолмоқда. Ханси Флик унинг тажрибаси, ишончлилиги ва оёқ билан яхши ўйнай олишини юқори баҳолайди. Спорт директори Деку аллақачон музокаралар бошлашга ҳаракат қилган, бироқ ҳозирча каталонияликлар ушбу трансферни амалга ошира олмайди. «Барселона»нинг устувор вазифаси — дастлаб дарвозабонлар чизиғини бўшатиш. Клуб Марк-Андре тер Штеген ва Иньяки Пеньяни сотиш учун имкониятлар изламоқда. Бу масалалар ҳал бўлмагунича, «Барса»нинг молиявий имкониятлари чекланган.

Ремиро шошилмаяпти, аммо «Барселона»ни ўз варианти сифатида устувор деб ҳисобламоқда. Каталонияликлардан ташқари, унга Англиянинг «Астон Вилла» ва «Кристал Пэлас», шунингдек, Италия, Германия клублари ва Ла Лиганинг бошқа жамоалари қизиқиш билдирмоқда.