«Real Sosyedad» yozda o‘z darvozaboni Aleks Remironi sotishga tayyor. Bu haqda Mundo Deportivo xabar bermoqda. 2027 yilgacha amal qiladigan shartnomaga ega 31 yoshli posbon klub rahbariyatiga jamoani o‘zgartirish istagi borligini bildirgan. Agar klubga 8–10 million yevro atrofida taklif tushsa, ular futbolchini qo‘yib yuborishga tayyor.

Remiro «Barselona»ning e’tibor markazida qolmoqda. Xansi Flik uning tajribasi, ishonchliligi va oyoq bilan yaxshi o‘ynay olishini yuqori baholaydi. Sport direktori Deku allaqachon muzokaralar boshlashga harakat qilgan, biroq hozircha kataloniyaliklar ushbu transferni amalga oshira olmaydi. «Barselona»ning ustuvor vazifasi — dastlab darvozabonlar chizig‘ini bo‘shatish. Klub Mark-Andre ter Shtegen va Inyaki Penyani sotish uchun imkoniyatlar izlamoqda. Bu masalalar hal bo‘lmagunicha, «Barsa»ning moliyaviy imkoniyatlari cheklangan.

Remiro shoshilmayapti, ammo «Barselona»ni o‘z varianti sifatida ustuvor deb hisoblamoqda. Kataloniyaliklardan tashqari, unga Angliyaning «Aston Villa» va «Kristal Pelas», shuningdek, Italiya, Germaniya klublari va La Liganing boshqa jamoalari qiziqish bildirmoqda.