«Сассуоло» ҳужумчиси Доменико Берарди ўзининг ва клубнинг ўтган мавсумдаги иштирокига баҳо берди. «Сассуоло» Италия чемпионати олий лигасида мавсумни 11-ўринда якунлади.

«Ўзимга ҳам, клубга ҳам «саккиз» баҳо қўяман. Ўйлашимча, мавсумнинг сўнгги қисмини яхшироқ ўтказишимиз мумкин эди. Биз 50 очко жамғариб, камида ўнинчи ўринни эгаллашимиз керак эди. Шахсан ўзим эса камида ўнта гол ура олмаганимдан афсусдаман», – дея футболчининг сўзларини келтиради Италиянинг La Gazzetta dello Sport нашри.

Эслатиб ўтамиз, ўтган мавсумда Берарди чемпионатда 8 та гол киритди, аммо у ўз жамоасининг энг яхши тўпурари бўла олмади.