Англия терма жамоаси ҳужумчиси Энтони Гордон «Ньюкасл Юнайтед»дан «Барселона»га ўтгани ҳақида фикр билдирди.
«Мен «Ньюкасл»дан жуда миннатдорман. Бу ерга келганимда ҳам футболда, ҳам оддий ҳаётда бироз ўзимни йўқотиб қўйган эдим. Ушбу клуб менга жамиятнинг бир қисми эканлигимни ҳис қилишга ёрдам берди ва шахсиятимни шакллантирди. У менга истаган ишим билан шуғулланиш имконини берди, катта саҳнага олиб чиқди ва ушбу жамоа либосида тўп суриш бахтини тақдим этди.
«Ньюкасл»га келган вақтимдан бери майдонда анча ўсганимни ҳис қиляпман. Клуб уч ярим йил давомида шахс сифатида шаклланишимда ҳам катта роль ўйнади. Бу ердан юқори кайфиятда кетиш мен учун жуда муҳим эди, чунки «Ньюкасл»даги ҳар бир дақиқамдан завқ олдим. Бу ақл бовар қилмайдиган клуб, уни ҳеч қачон унутмайман. Умримнинг охиригача ушбу жамоага мухлислик қиламан», — дея Гордоннинг сўзларини келтиради клуб расмий сайти.
