Афсонавий футболчи Рио Фердинанд Чемпионлар лигаси финалида «Арсенал» ва «ПСЖ» ўртасида бўлиб ўтадиган тўқнашув ҳақида ўз фикрларини билдирди. Ветеран ҳимоячи парижликлар футбол ўйнашда устунроқ эканини тан олса-да, лондонликлар стандарт вазиятларда хавфлироқ бўлишини таъкидлади.

«ПСЖ» — 100 фоиз энг яхши жамоа. Улар ҳозирда кучли таркибга эга, техник жиҳатдан юқорироқ футбол намойиш этишмоқда ва уларнинг ўйин услуби мукаммалроқ. Улар айни дамда сайёрадаги энг яхши жамоа ва уларнинг мураббийи [Луис Энрике] ҳозирги пайтда энг зўри», — деди Фердинанд Rio Presents ютуб-каналида.

Шу билан бирга, Рио парижликларнинг стандарт вазиятлардаги заиф томонларига эътибор қаратди: «Аммо улар стандарт вазиятларда ишончсиз кўринишмоқда. Ҳатто стандарт вазиятларда кучли бўлмаган «Бавария» ҳам уларни қийин аҳволга солиб қўйди, буни жорий мавсумда кўп бора кузатдим».

«Арсенал» эса стандарт вазиятлар бўйича Премьер-лигадаги энг яхши жамоа ҳисобланади. Агар улар бурчак тўплари, жарима зарбалари ва аутлардан унумли фойдалана олишса, «ПСЖ» учун чинакам «қирғин» уюштиришади», — дея қўшимча қилди у.

Эслатиб ўтамиз, «Арсенал» ва «ПСЖ» ўртасидаги финал 30 май куни бўлиб ўтади. 2024/2025 йилги мавсумда Луис Энрике шогирдлари финалда «Интер»ни 5:0 ҳисобида мағлуб этиб, бош совринни қўлга киритган эди.