Ўзбекистон футбол ассоциациясида Илгиз Танташев бошчилигидаги ҳакамлар бригадасини ФИФА Жаҳон чемпионатига кузатиш олдидан учрашув ташкил этилди.

Тадбирда ЎФА биринчи вице-президенти ҳамда мутасаддилар иштирок этиб, ҳакамларимизни тарихий мусобақа арафасида самимий қутлади ва уларга омад тилади.

«Бугун барчамиз қувончли кунда турибмиз. Яқинда муҳтарам Президентимиз футболчиларимизни Жаҳон чемпионатига кузатар эканлар, уларнинг нақадар қувонганларини барчамиз кўрдик. Бугун эса ҳакамларимиз Жаҳон чемпионатида иштирок этиш учун йўлга чиқмоқда. Терма жамоа ҳам, ҳакамлар ҳам бир вақтнинг ўзида Жаҳон чемпионатида қатнашиши асосан футболи ривожланган йирик давлатларга хос ҳолат. Бугун эса биз ҳам ана шундай мамлакатлар сафидан жой олдик.

Бу тарихий Жаҳон чемпионатидаги иштирокингиз ниҳоятда муҳим. Сиз у ерда Ўзбекистон номидан майдонга чиқасиз ва миллионлаб футбол мухлисларида юртимиз ҳақида таассурот қолдирасиз. Албатта, масъулият ва босим юқори бўлади. Аммо сизларнинг бу синовларни муносиб енгиб ўтишингизга ишонаман. Ўзбекистон футбол ассоциацияси, устозларингиз ва бутун футбол жамоатчилиги доимо сизлар билан бирга. Биз ҳар доим сизларни қўллаб-қувватлашга тайёрмиз», — деди Равшан Эрматов.

Тадбир якунида ҳакамлар бригадаси билан эсдалик суратига тушилди ва уларга ФИФА Жаҳон чемпионатидаги фаолиятида улкан муваффақиятлар тиланди.