«Ливерпуль» клубининг собиқ футболчиси Стивен Джеррард Чемпионлар лигаси финалида «Арсенал»нинг «ПСЖ»га пенальтилар сериясида имкониятни бой бергани борасида ўз фикрларини билдирди. «Канонирлар» учрашув бошидаёқ ҳисобни очишганди, бироқ парижликлар иккинчи бўлимда мувозанатни тиклашди ва якунда 11 метрлик зарбаларни аниқроқ ижро этишди.

«Арсенал»нинг эришган ютуқларини камситмаслик керак. Жамоа фантастик ишни амалга оширди. Мағлубият доим оғир, пенальтилар сериясидагиси эса — икки ҳисса азоб. Уларга фақат ҳамдардлик билдириш мумкин. Менимча, бу муваффақиятсизлик уларга қаттиқ таъсир қилмайди. «Арсенал»да ажойиб жамоавий руҳ бор, ҳеч қандай худбинлик кўзга ташланмайди. Артета — ёш ва амбицияли мураббий.

Премьер-лигадаги ғалабани шунчаки унутиб бўлмайди. Мен 15 йил давомида АПЛда ғолиб чиқишга ҳаракат қилганман, лекин буни уддалай олмаганман. Бу нақадар қийин эканлигини ҳамма билади. Ажойиб мавсумнинг оғир якуни, лекин финалда мағлуб бўлиш керак бўлса, мана шундай — охиригача курашиб, бор кучни бериб ютқазиш керак. Улар мақтовларга лойиқ», — деди Джеррард TNT Sports билан суҳбатда.

«ПСЖ» учун бу Чемпионлар лигасидаги кетма-кет иккинчи зафар бўлди. «Арсенал» эса ҳали ҳам ушбу нуфузли совринни боши узра баланд кўтара олгани йўқ.