Туркия футбол федерацияси (ТФФ) президенти Иброҳим Ҳожиусмонўғли терма жамоа бош мураббийи Винченцо Монтелла билан боғлиқ қизиқарли воқеани сўзлаб берди. Унинг сўзларига кўра, италиялик мутахассис бир йил муқаддам ўз лавозимини тарк этиши мумкин эди.
Монтелла қўл остидаги Туркия терма жамоаси Евро-2024да чорак финалгача етиб борган ва 2026 йилги жаҳон чемпионатига йўлланмани қўлга киритганди. Шунга қарамай, ўтган йилнинг март ойида, Миллатлар лигаси доирасидаги Венгрияга қарши ўйин арафасида вазият кескинлашган.
Ҳожиусмонўғлининг қайд этишича, ўша пайтда «Рома» клуби Монтеллага таклиф билан чиққан. Мураббий эса вазиятни очиқчасига федерация раҳбарияти билан муҳокама қилган.
«Монтелланинг шартномасида «Рома»дан таклиф тушса, кетиши мумкинлиги ҳақида банд йўқ эди. Шунга қарамай, у бизнинг олдимизга келиб, таклифни кўриб чиқишни истаётганини, айниқса, плей-оффдаги натижалар қониқарли бўлмаса, бу ҳақда ўйлаб кўриши мумкинлигини жуда одоб билан тушунтирди. Мен унга шу ерда эканман, бирга ишлашда давом этишимизни қатъий айтдим. Натижада, у ўзининг энг катта орзуси — «Рома»ни бошқариш истагидан воз кечди», — дейди федерация раҳбари Fanatik нашрига берган интервьюсида.
