Boston Dynamics компанияси гуманоид робот Atlas иштирокидаги янги видеони эълон қилди. Унда робот жаҳон чемпионатлари ўйинларини томоша қилиб, футболга оид ҳаракатларни ўзлаштираётгани акс этган. Бу намойиш 2026 йил АҚШ, Канада ва Мексикада бўлиб ўтадиган футбол бўйича Жаҳон чемпионатига бағишланган.

Видеода Atlas аввалига катта экранда ўйин эпизодларини кузатиб, футболчиларнинг тана ҳолати, ҳаракатлари ва турли вазиятлардаги реакцияларини таҳлил қилади. Сўнгра робот машғулот майдонига чиқиб, кўрган ҳаракатларини амалда деярли дарҳол такрорлайди. Масалан, Atlas вазнни таянч оёққа ўтказади, тўпни юмшоқ ҳаракатлар билан бошқаради ҳамда координация ва мувозанат учун машқларни бажаради — машғулот давомида унинг ҳаракатлари табиийроқ ва ишончлироқ тус ола бошлайди.

Робот нафақат футбол механикасини, балки ўйинчиларнинг ҳиссиётларини ҳам такрорлашга уринади: муваффақиятли бажарилган машқдан сўнг Atlas гол урилганини нишонлаётган футболчи каби қўлларини юқорига кўтаради, бошқа бир саҳнада эса жароҳат олган футболчининг реакциясини кўрсатади. Компания вакилларининг таъкидлашича, робот бу имо-ишораларни матч кадрларини кўргандан сўнг дарҳол такрорлаган.

Шунингдек, ишлаб чиқувчилар Atlas ва тўрт оёқли Spot роботи 2026 йилги Жаҳон чемпионати тадбирларида кўриниш бериши мумкинлигига ишора қилишди, бироқ роботларнинг аниқ вазифаси ҳақида ҳозирча маълумот берилмаган.