Конго Демократик Республикаси ва Чили миллий терма жамоалари ўртасида 9 июнь куни Испаниянинг Ла-Линеа-де-ла-Консепсьон шаҳрида ўтказилиши режалаштирилган ўртоқлик учрашуви бекор қилинди, деб хабар бермоқда Sports.kz.

Шаҳар мэри Хуан Франко Конго Демократик Республикасида Эбола вируси тарқалиши муносабати билан мазкур учрашувни ўтказишни тақиқловчи қарорни имзолади.

Мэрнинг сўзларига кўра, қарор Андалусия соғлиқни сақлаш вазирлиги тавсиялари ҳамда шаҳар санитария хизмати хулосаси асосида санитар хавфсизлик нуқтаи назаридан қабул қилинган.

«Биз бу қарорни қабул қилишга мажбур бўлганимиздан афсусдамиз, чунки мазкур учрашув шаҳар учун қизиқиш уйғотган эди. Бироқ Конгодаги санитар вазият ва тақдим этилган ҳужжатлар ҳар қандай хавфнинг мавжуд эмаслигига тўлиқ ишонч бермайди. Шу сабабли биз ушбу қарорни энг оқилона ечим деб ҳисоблаймиз», — деди Франко Mundo Deportivo нашрига берган интервьюсида.

Шунга қарамай, Конго ДР терма жамоаси Жаҳон чемпионати–2026га тайёргарликни давом эттирмоқда. Жамоа 3 июнь куни Бельгиянинг Льеж шаҳрида Данияга қарши ўртоқлик учрашувида майдонга тушиши керак.

Эслатиб ўтамиз, Конго ДР ўз тарихида иккинчи марта ва 1974 йилдан бери илк бор Жаҳон чемпионатида иштирок этади. Аввалроқ Испания расмийлари мазкур учрашувни ўтказиш учун эҳтимолий хавфсизлик чораларини ўрганаётганини маълум қилган, ФИФА эса тиббий протоколлар ва санитар талаблар масаласида Конго ДР футбол федерацияси билан доимий алоқада эканини билдирган эди.

Маълумот учун, ЖЧ-2026 гуруҳ босқичида Конго ДР К гуруҳидан ўрин олган бўлиб, Португалия, Колумбия ва Ўзбекистон терма жамоаларига қарши баҳс олиб боради.