Франция терма жамоаси марказий ҳимоячиси Вильям Салиба бўлажак Жаҳон чемпионатидаги ўз истиқболлари ҳақида ўз фикрлари билан ўртоқлашди. Лондоннинг «Арсенал» клуби футболчиси ўтган мундиалда «уч ранглилар» қайдномасида бўлган, бироқ майдонга фақат бир марта тушган холос.
Бу сафар эса 25 ёшли «канонирлар» юлдузининг асосий таркибдан жой олиш имкониятлари анча юқори.
«Мен ўтган Жаҳон чемпионатининг деярли барча ўйинларини захира ўриндиғида ўтказдим. Ўшанда ўзимга шундай деган эдим: «Кейинги турнирда мен албатта ўйнашим керак». Расман бўлажак чемпионат мен учун иккинчиси бўлади, лекин мен уни биринчиси деб ҳисоблайман», — дея Салибанинг сўзларини келтиради «Arsenal Radar».
Эслатиб ўтамиз, Франция терма жамоаси мундиал гуруҳ босқичида Сенегал, Ироқ ва Норвегия терма жамоалари билан бирга I гуруҳидан жой олган.
