Fransiya terma jamoasi markaziy himoyachisi Vilyam Saliba bo‘lajak Jahon chempionatidagi o‘z istiqbollari haqida o‘z fikrlari bilan o‘rtoqlashdi. Londonning «Arsenal» klubi futbolchisi o‘tgan mundialda «uch ranglilar» qaydnomasida bo‘lgan, biroq maydonga faqat bir marta tushgan xolos.

Bu safar esa 25 yoshli «kanonirlar» yulduzining asosiy tarkibdan joy olish imkoniyatlari ancha yuqori.

«Men o‘tgan Jahon chempionatining deyarli barcha o‘yinlarini zaxira o‘rindig‘ida o‘tkazdim. O‘shanda o‘zimga shunday degan edim: «Keyingi turnirda men albatta o‘ynashim kerak». Rasman bo‘lajak chempionat men uchun ikkinchisi bo‘ladi, lekin men uni birinchisi deb hisoblayman», — deya Salibaning so‘zlarini keltiradi «Arsenal Radar».

Eslatib o‘tamiz, Fransiya terma jamoasi mundial guruh bosqichida Senegal, Iroq va Norvegiya terma jamoalari bilan birga I guruhidan joy olgan.