Испания терма жамоаси устози Луис де ла Фуэнте жаҳон чемпионатига тайёргарлик доирасида Ироққа қарши ўтказиладиган ўртоқлик ўйини олдидан матбуот анжуманида иштирок этди. Испанияликлар мазкур баҳсни 4 июнь куни ўтказади.
Де ла Фуэнте икки нафар жароҳат олган футболчи — Ламин Ямал ва Нико Уильямс эртанги ўйинда иштирок эта олмаслигини маълум қилди.
«Эртага уларнинг ҳеч бири майдонга туша олмайди. Агар ҳаммаси ҳозиргидек кетса, улар 15 июнь куни ўйинни асосий таркибда бошлашлари мумкин. Аммо бу улар албатта ўйнайди дегани эмас, кўрамиз. Биз уларнинг ҳолатини ҳар бир босқичда баҳолаб борамиз», — дея мураббийнинг сўзларидан иқтибос келтиради Barca Blaugranes.
Мундиалнинг гуруҳ босқичида испанияликлар мос равишда 15, 21 ва 27 июнь кунлари Кабо-Верде, Саудия Арабистони ва Уругвай терма жамоаларига қарши баҳс олиб боришади.
