Ispaniya terma jamoasi ustozi Luis de la Fuente jahon chempionatiga tayyorgarlik doirasida Iroqqa qarshi o‘tkaziladigan o‘rtoqlik o‘yini oldidan matbuot anjumanida ishtirok etdi. Ispaniyaliklar mazkur bahsni 4 iyun kuni o‘tkazadi.
De la Fuente ikki nafar jarohat olgan futbolchi — Lamin Yamal va Niko Uilyams ertangi o‘yinda ishtirok eta olmasligini ma’lum qildi.
«Ertaga ularning hech biri maydonga tusha olmaydi. Agar hammasi hozirgidek ketsa, ular 15 iyun kuni o‘yinni asosiy tarkibda boshlashlari mumkin. Ammo bu ular albatta o‘ynaydi degani emas, ko‘ramiz. Biz ularning holatini har bir bosqichda baholab boramiz», — deya murabbiyning so‘zlaridan iqtibos keltiradi Barca Blaugranes.
Mundialning guruh bosqichida ispaniyaliklar mos ravishda 15, 21 va 27 iyun kunlari Kabo-Verde, Saudiya Arabistoni va Urugvay terma jamoalariga qarshi bahs olib borishadi.
