Ўзбекистон миллий терма жамоаси бош мураббийи Фабио Каннаваро ўз Instagram саҳифасида мундиалга тайёргарлик ҳақида пост жойлади.

"Биз буни ҳис қилиб турибмиз. Тобора яқинлашиб келаётган илк жаҳон чемпионатимиз учун тинимсиз меҳнат қиляпмиз.

Канадага қарши кечган ўртоқлик учрашувида (0:2) мағлубиятга учраган бўлсак-да, муносиб қаршилик кўрсатдик ва кўплаб голли вазиятлар яратдик. Фақат улардан унумли фойдалана олмадик, холос. Энди бизни ўз имкониятларимизни, хусусан, айни дамда қайси босқичда турганимизни билиб олишга ёрдам берадиган навбатдаги жиддий синов кутмоқда.

Душанба куни Нидерландияга қарши майдонга тушамиз ва энг юқори даражадаги футболчиларга қарши ўз кучимизни синовдан ўтказамиз. Буюк орзулар айнан мана шундай қурилади: кичик қадамлар билан босқичма-босқич илгарилаб борилади", - деб ёзган италиялик мутахассис.