Мадриднинг «Реал» клуби ҳужумчиси Килиан Мбаппе фаолияти давомида урган голларидан қайси бирини энг яхшиси деб ҳисоблашини маълум қилди.
«ЖЧ-2022 финалида Аргентина дарвозасига тўпни тўхтатмасдан йўллаган голим энг рамзий (тарихий) голим ҳисобланади, лекин уни ижро жиҳатидан энг чиройлиси дея оламанми, йўқми, билмайман. Менга 2020 йилги Франция кубогида «Лион» дарвозасига урган голим жуда ёқади: тўпни ўз майдонимиз ярмида олиб қўйиб, кейин бутун майдон бўйлаб югуриб ўтгандим, икки нафар рақибни алдаб ўтиб, гол ургандим. Ўша вазиятни жуда кўп марта қайта кўриб чиққанман», — дея Madrid Universal нашри 27 ёшли франциялик футболчининг сўзларини келтиради.
Килиан Мбаппе 2024 йилнинг ўрталаридан буён «Реал» шарафини ҳимоя қилиб келмоқда. Бунгача у ўз ватанида «Пари Сен-Жермен» ва «Монако» клублари рангларини ҳимоя қилган.
