«Барселона» ва Испания терма жамоасининг собиқ ҳужумчиси Давид Вилья собиқ жамоадоши Лионель Месси ҳақида гапирди. Испания миллий терма жамоаси тарихидаги энг яхши тўпурар 2010 йилдан 2013 йилгача «кўк-анорранглилар» шарафини ҳимоя қилган ва у ерда аргентиналик юлдуз билан бирга тўп сурган.
«Мессининг футболга ва умуман спортга кўрсатган таъсири мутлақо инкор этиб бўлмасдир. «Барса»да ўйнаб юрган кезларимда 49 та гол урганман — уларнинг деярли барчаси Лео берган узатмалардан кейин содир бўлган. Мен ҳеч қачон унга ўхшаш футболчини кўрмаганман. Месси — энг яхшиси», — дея Barca Universal нашри Вильянинг сўзларини келтиради.
Лионель Месси Каталония клубини 2021 йилда тарк этган эди, 2023 йилдан буён эса МЛСда «Интер Майами» сафида тўп суриб келмоқда.
