Миланнинг «Интер» клуби бош мураббийи Кристиан Киву ҳозирги лавозимидаги дебют мавсумини муваффақиятли ўтказди, бироқ барибир ишдан бўшатилиш хавфи ҳақидаги хаёллар уни четлаб ўтмади. Руминиялик мутахассис бу лавозимни ўтган йилнинг июнь ойида — Саудия Арабистонига йўл олган Симоне Индзагининг ўринбосари сифатида эгаллаган эди.
«Мавсум давомида мени ишдан бўшатишлари мумкинлиги ҳақида ўйладимми? Ҳа, бундай хаёллар бўлди. Айниқса, «Ювентус» ва «Удинезе»дан учралган мағлубиятлардан кейин. Ўшанда менга ҳамма нарса барбод бўлаётгандек туюлганди. Мени ўша заҳотиёқ руҳлантиришди. Бутун мавсум давомида мен фақат қўллаб-қувватлаш ва ишончни ҳис қилдим», — деди Киву Gazzetta dello Sport нашрига берган интервьюсида.
Эслатиб ўтамиз, «нерадзуррилар» якунланган мавсум натижаларига кўра А Серия ва Италия Кубоги ғолибига айланишди.
