Юрген Клоппнинг манфаатларини ҳимоя қилувчи Марк Косицке мижозининг Мадриднинг «Реал» клуби бош мураббийи этиб тайинланиши мумкинлиги ҳақидаги хабарларга муносабат билдирди. «Қироллик клуби» президентлигига номзод Энрике Рикельме агар сайловда ғалаба қозонса, «Ливерпуль»нинг собиқ устози билан музокараларни бошлашини маълум қилган эди.
«Бу одамнинг асабига тегяпти! Юрген ўзининг ҳозирги лавозимидан мамнун ва клуб даражасида мураббийлик фаолиятига қайтиш нияти йўқ. «Реал» билан боғлиқ саҳифа у учун ёпилган — айниқса, ҳозирги шароитда. Келажакда у мураббий сифатида ишлаши мумкин бўлган ягона жой — бу Германия терма жамоаси», — дея журналист Флориан Плеттенберг Косицкенинг сўзларини келтиради.
Эслатиб ўтамиз, Юрген Клопп 2015 йилдан 2024 йилгача «Ливерпуль»ни бошқарган, 2025 йилнинг бошидан буён эса «Red Bull» футбол тизимида раҳбарлик лавозимида фаолият юритиб келмоқда.
