«Манчестер Юнайтед» ижрочи директори Омар Беррада ўғли илгари «Манчестер Сити»га мухлислик қилганини тан олди. Франциялик бизнесмен «МЮ»даги лавозимига 2024 йилнинг ёзида тайинланган эди. Бунгача у қарийб 13 йил давомида «шаҳарликлар» тизимида турли лавозимларда фаолият юритган.
«Ўғлим «Манчестер Сити» мухлиси эди. Мен «Юнайтед»га ўтганимдан кейин унинг менга айтган биринчи гапи шундай бўлди: «Сиз у ерда ишлашингиз мумкин, лекин мен «Сити»ни қўллаб-қувватлашда давом этаман». Мен эса: «Яхши, бу сенинг танловинг», деб жавоб бердим. Аммо ҳозир ҳаммаси ўзгарди — у «Юнайтед»нинг тўлақонли мухлисига айланди. У ўйинларга тез-тез ташриф буюриб туради, севимли футболчиси эса — Брайан Мбеумо», — дея Берраданинг сўзларини келтиради Англия ОАВлари.
Якунланган мавсумда «қизил иблислар» Премьер-лигада учинчи ўринни эгаллашди. «Манчестер Сити» эса иккинчи поғонадан жой олди.
