«Барселона» вингери Рафинья Диас Бразилия терма жамоасига ўртоқлик учрашувида Мисрни мағлуб этишда (2:1) ёрдам берди. 29 ёшли футболчи майдонга бошланғич таркибда тушди ва 71-дақиқагача ҳаракат қилди. Иккинчи бўлим бошида «кўк-анорранглилар»нинг юлдуз ўйинчиси ғалаба тўпини киритган Эндрикка голли узатма етказиб берди.

«Терма жамоада бор имкониятимни намойиш этиш учун доим энг яхши тарзда тайёргарлик кўришга ҳаракат қиламан. Яқиндагина жароҳатдан фориғ бўлдим, у сабабли қарийб бир ойни ўтказиб юборгандим. Ҳали 100 фоиз тайёр эмасман — жисмоний ҳолатим устида ишлашим керак. Бугун мен учун майдонда вақтга эга бўлиш ва ўйин ритмини ҳис қилиб олиш жуда муҳим эди», — деди Рафинья ўйиндан кейинги интервьюсида.

14 июнь куни Карло Анчелотти шогирдлари ЖЧ-2026 гуруҳ босқичининг 1-тури доирасида Марокашга қарши баҳс олиб боришади.