«Barselona» vingeri Rafinya Dias Braziliya terma jamoasiga o‘rtoqlik uchrashuvida Misrni mag‘lub etishda (2:1) yordam berdi. 29 yoshli futbolchi maydonga boshlang‘ich tarkibda tushdi va 71-daqiqagacha harakat qildi. Ikkinchi bo‘lim boshida «ko‘k-anorranglilar»ning yulduz o‘yinchisi g‘alaba to‘pini kiritgan Endrikka golli uzatma yetkazib berdi.

«Terma jamoada bor imkoniyatimni namoyish etish uchun doim eng yaxshi tarzda tayyorgarlik ko‘rishga harakat qilaman. Yaqindagina jarohatdan forig‘ bo‘ldim, u sababli qariyb bir oyni o‘tkazib yuborgandim. Hali 100 foiz tayyor emasman — jismoniy holatim ustida ishlashim kerak. Bugun men uchun maydonda vaqtga ega bo‘lish va o‘yin ritmini his qilib olish juda muhim edi», — dedi Rafinya o‘yindan keyingi intervyusida.

14 iyun kuni Karlo Anchelotti shogirdlari JCH-2026 guruh bosqichining 1-turi doirasida Marokashga qarshi bahs olib borishadi.