Ўзбекистон миллий терма жамоаси бош мураббийи Фабио Каннаваро жамоа таркибини шакллантириш тамойиллари, ёш ва тажрибали футболчилар ўртасидаги мувозанат ҳамда келгуси йирик турнирлардаги мақсадлар ҳақида фикр билдирди.

"Албатта, таркибни шакллантираётганимда ўтмишга ҳам эътибор қаратдим. Жамоада ўн йилга яқин вақт давомида ўйнаб келаётган футболчиларни ҳам инобатга олдим. Чунки жаҳон чемпионатига чиқиш йўлида хизмат қилган футболчилар бу ерда бўлишга лойиқ деб ҳисоблайман. Лекин менинг позициям жуда аниқ. Мен учун футболчининг исми ёки ўтмишда нималарга эришгани ҳал қилувчи омил эмас. Агар сиз ўзингизни кўрсата олсангиз, учрашувларда яхши ўйнасангиз, ҳатто ўн олти ёшда бўлсангиз ҳам сизни терма жамоага чақираман.

Бунга яқин ҳам келгандим, чунки U-17 ва U-19 жамоаларида эътиборимни тортган бир нечта футболчиларни кўрдим. Шу билан бирга, биз миллий терма жамоа пойдеворини ҳам тайёрлаяпмиз. Шунинг учун таркибда ёш ва тажрибали футболчилар ўртасида тўғри мувозанат бўлиши керак. Боиси, тажрибали футболчилар ўз тажрибасини ёшлар билан бўлишиши лозим. Ёш футболчилар учун ҳам тажрибали ўйинчилар бор жамоага келиш жуда муҳим, сабаби улар ёшларнинг ўсишига ва мослашишига ёрдам беради. Албатта, сентябр ойидан бошлаб Осиё кубогига тайёргарлик кўриш жараёнида таркибга янги кучлар, янги футболчиларни ҳам жалб қилишимиз керак бўлади.

Мен бу ерга келганимдан бери бир фикрни такрорлаб келаман: жаҳон чемпионати биз учун ўрганиш ва ривожланиш имконини беради. Бу турнир бизга ўсиш учун хизмат қилиши керак. Агар яхши натижаларга эришсак, бундан жуда хурсанд бўламиз. Агар бундай бўлмаса, биз ўз ишимизни ва бошлаган лойиҳамизни давом эттирамиз. Чунки биз учун кейинги муҳим мақсад Осиё кубоги ҳисобланади", — дея таъкидлади бош мураббий.