Германия терма жамоаси бош мураббийи Юлиан Нагельсманн дарвозабон Мануэль Нойер терма жамоанинг бошланғич таркибига қайтишини тасдиқлади. Жароҳати сабабли охирги вақтларда майдонга туша олмаган жамоа фахрийси Жаҳон чемпионатининг 1-туридан ўрин олган Кюрасаога қарши учрашувда сафга қайтади.

40 ёшли Нойерсиз Германия терма жамоаси 2 та ўртоқлик учрашуви ўтказиб, Финляндияни тор-мор этди (4:0) ва АҚШ устидан ғалаба қозонди (2:1).

«Ману келаси ҳафтадан машғулотларни бошлайди ва Кюрасаога қарши ўйинда майдонга тушади», — деди Нагельсманн RTLга берган интервьюсида.

Германиялик мураббий Нойернинг ўринбосари Оливер Бауманни ҳам алоҳида мақтаб ўтди: «Оливерга катта раҳмат айтмоқчиман. У ажойиб йигит. Сўнгги кунлар ва ҳафталарда у ўзини бутунлай жамоа манфаатларига бағишлади».

Германия терма жамоаси гуруҳ босқичида Кюрасаодан ташқари, Эквадор ва Кот-д'Ивуар вакилларига қарши ҳам баҳс олиб боради.