«Барселона» ва «Манчестер Сити» клубларининг собиқ футболчиси Яя Туре Братиславанинг «Слован» клуби билан ҳамкорлик шартларини келишиб олди, у жамоада бош мураббий сифатида иш бошлайди. Бу ҳақда Sky Sports хабар бермоқда.
«Слован»даги фаолият Туре учун бош мураббий ролидаги биринчиси бўлади. Унга аввалроқ «Селтик» ва «Суонси Сити» клубларида ишлаган Даррен О'Ди ёрдамчилик қилиши кутилмоқда.
Бундан олдин Яя Туре «Тоттенхэм Хотспур» академиясида фаолият юритган, шунингдек, Белгиянинг «Стандард» клуби ҳамда Саудия Арабистони терма жамоасида бош мураббий ёрдамчиси сифатида меҳнат қилган эди.
2025/2026 йилги мавсум якунларига кўра, «Слован» Словакия чемпионига айланди. Агар Чехословакия давридаги совринлар ҳам ҳисобга олинса, ушбу жамоа мамлакатнинг 27 карра чемпиони ҳисобланади.
