«Barselona» va «Manchester Siti» klublarining sobiq futbolchisi Yaya Ture Bratislavaning «Slovan» klubi bilan hamkorlik shartlarini kelishib oldi, u jamoada bosh murabbiy sifatida ish boshlaydi. Bu haqda Sky Sports xabar bermoqda.
«Slovan»dagi faoliyat Ture uchun bosh murabbiy rolidagi birinchisi bo‘ladi. Unga avvalroq «Seltik» va «Suonsi Siti» klublarida ishlagan Darren O'Di yordamchilik qilishi kutilmoqda.
Bundan oldin Yaya Ture «Tottenxem Xotspur» akademiyasida faoliyat yuritgan, shuningdek, Belgiyaning «Standard» klubi hamda Saudiya Arabistoni terma jamoasida bosh murabbiy yordamchisi sifatida mehnat qilgan edi.
2025/2026 yilgi mavsum yakunlariga ko‘ra, «Slovan» Slovakiya chempioniga aylandi. Agar Chexoslovakiya davridagi sovrinlar ham hisobga olinsa, ushbu jamoa mamlakatning 27 karra chempioni hisoblanadi.
