Франция терма жамоаси бош мураббийи Дидье Дешам бўлажак Жаҳон чемпионати ҳақида ўз фикрларини билдириб ўтди. «Учранглилар» мундиалнинг асосий фаворитлари қаторига киритилмоқда. Бироқ Дешам французларнинг 2002 йилги мусобақада қандай иштирок этганини ёдга олди.

«Ҳозир таркибимизда жуда кўплаб иқтидорли ҳужумкор футболчилар бор. Улар буни ўз клубларида ҳам, терма жамоада ҳам исботлашмоқда. Аммо менинг хотирам панд бермайди. 2002 йилда Франция таркибида Англия, Италия ва Франция лигаларининг энг яхши тўпурарлари бор эди, лекин биз бирорта ҳам гол ура олмай, гуруҳ босқичидаёқ турнирдан чиқиб кетганмиз», — дея Дешамнинг сўзларини келтиради Le Parisien.

2002 йилги Жаҳон чемпионатида Франция терма жамоаси Сенегал (0:1), Уругвай (0:0) ва Дания (0:2) терма жамоаларига қарши ўйинларда бор-йўғи бир очко тўплаган эди. Ўшанда французлар таркибида Тьерри Анри, Зинедин Зидан, Давид Трезеге ва Жибриль Сиссе каби кўплаб юлдузлар тўп тепишган.