Англия терма жамоаси бош мураббийи Томас Тухель ярим ҳимоячи Деклан Райс Жаҳон чемпионати (ЖЧ-2026) финал босқичида жамоанинг вице-капитани бўлишини тасдиқлади.
27 ёшли футболчи «Арсенал»нинг бошқа ўйинчилари билан биргаликда 6 июнь куни кечқурун Уэст-Палм-Бичдаги (Флорида штати) базага етиб келди.
«Менимча, Деклан — вице-сардор, деб айта оламан. Райс ўз роли ҳақида биладими? Яхши савол. Мен ҳам айнан шу ҳақда ўйлаётган эдим. Бу расмийми ёки йўқми. Аммо назаримда, бу ҳақда Харри Кейн йиғинда биз билан бўлмаган вақтда гаплашган эдик. Ўшанда ўйинни Олли Уоткинс билан бошлагандик ва Деклан сардор эди. Ўшанда мен буни унга айтгандим», — дея германиялик мутахассиснинг сўзларини келтиради PA ахборот агентлиги.
Райс терма жамоадаги дебютини 2019 йилнинг март ойида ўтказган. У ўзи иштирок этган 72 та учрашувда 6 та гол урди ва 6 та голли узатмани амалга оширди.
Англия терма жамоаси ЖЧ-2026 финал босқичининг гуруҳ босқичида Хорватия, Гана ва Панама терма жамоаларига қарши баҳс олиб боради.
