Осиё футбол конфедерацияси (ОФК) 2026—2027-йилги мавсум учун клублар миқёсидаги қитъа мусобақаларида иштирок этиш ҳуқуқини берувчи лицензиялаш натижаларини эълон қилди. Унга кўра, Ўзбекистоннинг 19 та клуби махсус текширувлардан муваффақиятли ўтиб, профессионал мақомга эга бўлди.
Рўйхатдан Суперлиганинг барча иштирокчилари, шунингдек, Пролиганинг учта жамоаси — “Арал”, “Металлург” ва “Шўртан” жой олди. Қорақалпоғистоннинг “Арал” жамоаси ўз тарихида илк бор лицензияга эга чиқди.
ОФК маълумотига кўра, лицензияга эга клублар сони бўйича Ўзбекистон ва Қатар қитъада етакчилик қилмоқда (19 тадан). Ундан кейинги ўринни 18 та клуби лицензиядан ўтган Саудия Арабистони банд этган.
Клубларнинг ОФК талабларига (инфратузилма, юридик ва молия масалалари бўйича) жавоб бериши уларнинг халқаро майдондаги иштирокини таъминлайди. Хусусан, апрель ойида ОФК Элит Чемпионлар Лигасида Ўзбекистон квотаси яна биттага кўпайтирилгани ҳисобига, “Насаф” клуби ҳам келгуси мавсумдан қитъа мусобақасида иштирок этади.
Шунингдек, ҳозирда маҳаллий лигаларда университет жамоалари (ФарДУ, БухДУ, ТерДУ), ёшлар лойиҳалари (“Олимпик Mobiuz”, “Республика ФА”) ва хусусий клублар (“Ғазалкент”, “Каттақўрғон”) ҳам фаолият юритмоқда. Бироқ улар тузилиш шакли ёки янги ташкил этилгани сабабли ҳозирча ОФК лицензиясини олмаган. Ўзбекистон Профессионал футбол лигаси йил якунига қадар ушбу жамоаларнинг инфратузилмасини ўрганиб чиқади. Текширувлардан ўтган тақдирда, профессионал мақомга эга клублар рўйхати кенгайиши мумкин.
