Жаҳон чемпионати–2026га тайёргарлик доирасида Ироқ ва Венесуэла терма жамоалари ўртасида ўртоқлик учрашуви бўлиб ўтди.
Баҳс АҚШнинг Чикаго штатидаги Бриджвью шаҳрида жойлашган «Ситгик Стэдиум» аренасида ўтказилди ва Венесуэланинг 2:0 ҳисобидаги ғалабаси билан якунланди.
Учрашувда ҳисоб 17-дақиқада Кристиан Кассерес томонидан очилди. Иккинчи бўлим бошланиши билан, 46-дақиқада Жезус Рамирес Венесуэланинг устунлигини мустаҳкамлади.
Ироқ терма жамоаси эса ўйинни бир киши кам бўлиб якунлади. Учрашувнинг 72-дақиқасида Али Юсиф тўғридан тўғри қизил карточка олиб, майдонни тарк этди.
Эслатиб ўтамиз, Ироқ терма жамоаси 11 июндан 19 июлгача АҚШ, Мексика ва Канадада бўлиб ўтадиган Жаҳон чемпионати–2026 иштирокчиларидан бири ҳисобланади. Қуръа натижаларига кўра, ироқликлар I гуруҳида Франция, Сенегал ва Норвегия терма жамоалари билан баҳс олиб боради.
Венесуэла терма жамоаси эса жаҳон чемпионатининг финал босқичига йўлланма қўлга кирита олмаган.













