Мадриднинг «Реал» клуби машҳур спорт бренди ҳисобланган «Adidas» компанияси билан янги ҳомийлик шартномасини имзолади. Ҳамкорлик муддати узайтирилгани ҳақида «қаймоқранглилар»нинг расмий сайтида эълон қилинди.

Испания клуби ушбу компания билан яна 8 йил давомида ҳамкорлик қилади. Эслатиб ўтамиз, «Реал» «Adidas» билан илк бор 1980 йилда ҳомийлик шартномасини тузган эди.

«Илк бор 1980 йилда расмийлаштирилган ушбу алоқа клубимизни Европа футболининг мутлақ етакчисига айлантирди ва жамоамиз учта чизиқли либосда 8 марта Чемпионлар Лигаси бош совринини қўлга киритди. 35 йилдан ортиқ давом этган ҳамкорлик давомида бу иттифоқ «Реал» тарихи, маданияти ва мухлисларига ҳурмат бажо келтирувчи дизайнлари билан ажралиб турди», — дейилади клуб баёнотида.

Ла Лиганинг якунланган мавсуми финиш жадвалида Мадрид клуби чемпионликни «Барселона»га бой бериб, иккинчи ўринни эгаллади.