Испания терма жамоаси ва Мадриднинг «Реал» клуби собиқ дарвозабони Икер Касильяс «Порту» клубидан йирик миқдорда пул компенсацияси талаб қилмоқда. Бу ҳақда AS нашри журналистлари хабар берди.

Манбанинг маълум қилишича, собиқ посбон «аждарҳолар» машғулоти пайтида ўзи ўтказган юрак хуружи (инфаркт) сабабли Португалия клубидан 3,7 миллион евро ундириб олмоқчи. Ушбу воқеадан бир неча ой ўтиб, испаниялик футболчи профессионал фаолиятини якунлашга қарор қилган эди.

Касильяснинг таъкидлашича, юрак хуружига машғулот жараёнидаги ҳаддан ташқари зўриқиш сабаб бўлган. Икернинг сўзларига кўра, бу ҳодиса унинг кейинги ҳаётига жиддий таъсир кўрсатган.

«Мен спорт залига бораман, падел-теннис ўйнайман, лекин кўп югура олмайман. Максимум 50 метргача», — дея собиқ дарвозабоннинг суд мажлисидаги гапларидан иқтибос келтирмоқда манба.

Эслатиб ўтамиз, Икер Касильяс 2020 йилнинг ёзида футболчилик фаолиятига якун ясаган эди.