Аргентинанинг «Бока Хуниорс» клуби ёзги мавсумни ўзгаришлар шабодаси билан кутиб олди — клуб бир нечта футболчилар, жумладан, Парижнинг «ПСЖ» клуби собиқ ярим ҳимоячиси, таниқли Андер Эррера билан хайрлашганини эълон қилди.
Испаниялик футболчи Аргентина клубида барқарор ўйин кўрсата олмади — у «Бока Хуниорс» сафида бўлган бутун даври давомида бор-йўғи 29 та ўйинда майдонга тушди, холос. Шу сабабли, энди у ўзига янги иш жойи излашига тўғри келади.
Маълумот учун, футболчи фаолияти давомида Испаниянинг «Сарагоса», Баскониянинг «Атлетик Бильбао» ҳамда Англиянинг «Манчестер Юнайтед» каби жамоаларида тўп сурган. Шунингдек, Испания терма жамоаси сафида 2 та ўйинда майдонга тушган.
