Тошкентда ўқув-машғулот йиғинини ўтказаётган Ўзбекистон U-19 ёшлар терма жамоаси Япония ёшлар терма жамоасига қарши иккинчи ўртоқлик учрашувида майдонга тушди. Қизиқарли кечган учрашувда 2:2 ҳисобидаги дуранг натижа қайд этилди. Ўзбекистон ёшлар терма жамоаси учрашув давомида икки бора олдинга чиқиб олган бўлса-да, япониялик ёшлар икки маротаба ҳисобни тенглаштиришга эришдилар.

Эслатиб ўтамиз, ушбу терма жамоаларнинг 5 сентябрь куни «ЖАР» стадионида кечган илк ўйинида Япония ёшлар терма жамоаси 3:2 ҳисобида ғалаба қозонган эди. Алексей Евстафеев шогирдларининг Тошкентдаги йиғини 9 сентябргача давом этади.

Маълумот ўрнида, Ўзбекистон ёшлар терма жамоаси шу йилнинг 4-12 октбярь кунлари 2014 йили Мянмада бўлиб ўтадиган ёшлар ўртасидаги Осиё чемпионати саралаш баҳсларида иштирок этади. Ўзбекистон ёшлари саралаш баҳсларининг «А» гуруҳида Қатар, Туркманистон, Ҳиндистон ва Непал ёшлар терма жамоаларига қарши баҳс олиб борадилар. «А» гуруҳи баҳсларига эса, Қатар мезбонлик қилади.

Ўртоқлик учрашуви. Тошкент. «ЖАР» стадиони
8 сентябрь, якшанба
Ўзбекистон U-19 - Япония U-19 - 2:2
Голлар: И. Сидоров (6), М. Маҳмудов (84) - Н. Хавенаар (42), А. Григорьев (89, автогол)