Ўзбекистон терма жамоаси ярим ҳимоячиси ва ЦСКА собиқ футболчиси Аббосбек Файзуллаев «СЭ» нашрига берган интервьюсида Москва клубига қайтиш имкониятини кўриб чиқмаётганини маълум қилди.
— ЦСКАдан кетганингиздан кейин Туркиянинг «Истанбул Башахшеҳир» клубидаги мавсум ҳақида гапириб берсангиз. У ерга ўтишингиз қандай юз берди ва жароҳатлар туфайли икки бор узоқ муддатни ўтказиб юборганингизни ҳисобга олсак, бундан афсусланмайсизми?
— Ҳеч нарсадан афсусланмайман, нимаики бўлса — яхшиликка. Ўтиш жараёнининг ўзи жуда қийин бўлганди. Бошида улар мени рўйхатдан ўтказа олишмади ва мен кўп вақт йўқотдим — адашмасам, уч ҳафта. Жамоа билан машғулот ўтказа олмай, ўзим алоҳида ишладим.
Бу эса жисмоний ҳолатимга таъсир қилди, менимча, жароҳатлар ҳам шу сабабли бошланди. Бунгача фаолиятимда бирор марта ҳам жароҳат олмагандим, ўйинларни ўтказиб юбормасдим. Бу ерда эса бироз вақт йўқотилгани боис спорт формам юқори даражада эмасди. Лекин кейинчалик кўникиб кетдим, ундан сўнг жамоага янги мураббий келди.
— Нури Шаҳин, у ажойиб футболчилик фаолиятини ўтказган ва ўтган мавсумдан олдин Дортмунднинг «Боруссия» клубини бошқарган эди.
— Ҳа. У менга ишона бошлади ва унинг келиши билан ўзимни анча яхши ҳис қила бошладим. Умуман олганда, Туркиядаги биринчи мавсумимда ўзимни юз фоиз кўрсата олдим, деб айтолмайман, лекин такрорлайман, ҳеч нарсадан афсусланмайман. Чунки мен ўз орзум сари интиляпман.
— Истанбулда Ўзбекистон терма жамоаси сардори Элдор Шомуродов билан бирга ўйнаганингиз қанчалик ёрдам берди?
— Албатта, жамоада ватандошинг бўлиши чемпионатга ва бошқа мамлакатга кўникишда жуда катта ёрдам беради. Бунинг устига, биз жуда яхши дўстмиз, кўп мулоқот қиламиз. У ерда уйларимиз ҳам жуда яқин, пиёда уч-тўрт дақиқалик йўл. Менимча, бир жамоага ўтганимиз иккаламиз учун ҳам жуда яхши бўлди. Трансфердан олдин Элдорнинг ҳам у ерга ўтиши мумкинлигини эшитгандим ва бу менинг у клубга боришимга сабаблардан бири бўлганди.
— Яқинда ЦСКАга қайтишингиз мумкинлиги ҳақида миш-мишлар тарқалди. Сизга ҳақиқатан ҳам қизиқиш билдиришмоқдами?
— Бундан хабарим йўқ. Ҳозир у ерга қайтиш нотўғри қарор бўлган бўларди, чунки мен ўз ривожланишимда янги қадам ташлаб бўлдим. Европанинг кучли бешлик (Топ-5) лигаларига ўтишни хоҳлайман ва агар бу ерда яхши ўйин кўрсатсам, Худо хоҳласа, орзум амалга ошади.
Файзуллаев 2023 йилнинг август ойидан 2025 йилнинг июль ойига қадар ЦСКА шарафини ҳимоя қилган. Хавбек «ҳарбийлар» сафида барча турнирларда 72 та ўйин ўтказиб, 8 та гол урган ва 22 та голли узатмани амалга оширган.
