Россия футбол иттифоқи (РФС) бош котиби Максим Митрофанов Халқаро футбол федерацияси (ФИФА) 211 та аъзо миллий ассоциация иштирок этиши мумкин бўлган янги турнирни анонс қилганини маълум қилди.

«ФИФА 15 ёшгача бўлган футболчилар ўртасида янги турнир ташкил этилишини эълон қилди. Унда ташкилотга аъзо бўлган 211 та миллий ассоциация иштирок эта олади. ФИФАнинг принципиал позициясига кўра, мазкур мусобақага айрим миллий ассоциацияларга нисбатан аввал қабул қилинган қарорлар татбиқ этилмайди. ФИФА аъзоси бўлган ҳеч бир давлат ушбу турнир доирасида санкция остида бўлиши мумкин эмас.

Шу орқали ФИФА ўзининг асосий тамойилига қайтмоқда: футбол сиёсатдан ташқарида бўлиши керак. Бу ташкилотнинг барча болалар ва ўсмирлар мусобақаларини иштирокчилар учун максимал даражада очиқ қилиш йўлидаги биринчи қадами ҳисобланади.

Шунингдек, турнир инновацион форматда ўтказилади: ўйинлар 7×7, 8×8 ва 9×9 форматларида, қисқартирилган вақт ва кичрайтирилган майдонларда бўлиб ўтади. Бу формат мусобақани янада динамик ва ёш футболчилар учун қулай қилади.

Биз умуман олганда ФИФА ва унинг президенти Жанни Инфантино сиёсатини қўллаб-қувватлаймиз. Футбол мамлакатлар ўртасида ҳамкорлик воситаси бўлиши керак. Спортга нисбатан ҳеч қандай санкция ва чеклов қўлланилмаслиги лозим, бу спорт моҳиятига зид. Умид қиламизки, мазкур лойиҳа яқин вақт ичида амалга оширилади», — деди Митрофанов РФИ Telegram канали орқали.