Аргентина терма жамоаси Жаҳон кубоги соҳиби сифатида ўз унвонини ҳимоя қилишга тайёргарлик кўрмоқда. Кўпчиликни жамоа етакчиси — Лионель Мессининг мотивацияси қай даражада эканлиги қизиқтирмоқда. Унинг яқин дўсти Серхио Агуэро Лионель ўз орзусига эришган бўлса-да, унинг ғалабага бўлган иштиёқи сўнмаганига ишончи комил.

«Лео — жаҳон чемпионатида яна бир бор ғалаба қозонишга интиладиган футболчи. У шундай характердаги инсон, унда мотивация пасайиши кузатилмайди. Янги ғалаба учун у борини беради. Мен эса унинг кейинги жаҳон чемпионатида ҳам ўйнашига умид қиламан», — дея Агуэронинг сўзларини келтиради derbyderbyderby.it.

Эслатиб ўтамиз, 2008 йилда Месси ва Агуэро биргаликда Олимпиада «олтин»ини қўлга киритишган эди.