Лондоннинг "Кристал Пэлас" клуби янги бош мураббийни расман таништирди. Ушбу лавозимни франциялик Пьер Саж эгаллади, мутахассис билан уч йиллик шартнома имзоланди.
Сажнинг бундан аввалги иш жойи "Ланс" клуби эди. 47 ёшли мураббий якунланган мавсумда Лига 1 да "кончилар" билан биргаликда "ПСЖ"га чемпионлик унвони учун жиддий рақобат таклиф қила олди. Якунда жамоа иккинчи ўринни банд этди. У 2023–2025 йилларда "Лион" бош мураббийи сифатида ҳам фаолият юритган.
Эслатиб ўтамиз, мавсум якунланганидан сўнг Лондоннинг "бургутлари" Оливер Гласнер билан хайрлашишган эди. Германиялик мутахассиснинг клубдаги фаолияти ўта муваффақиятли кечди — бир йил ичида "Пэлас" футболчилари Англия Кубоги, Англия Суперкубоги ҳамда УЕФА Конференция Лигаси кубогини қўлга киритишди.
