Испания терма жамоаси сардори Микель Оярсабаль ўз жамоасининг Кабо-Вердега қарши ўйиндаги кутилмаган дурангига изоҳ берди. Жаҳон чемпионати биринчи туридан ўрин олган баҳс 0:0 ҳисобида якунланди.
«Бу қийин ўйин бўлди. Улар нима қилиш кераклигини жуда яхши англашди ва ўз жарима майдончалари атрофида 10-11 киши бўлиб тўпланишди. Биз гол уриш учун етарлича вазиятлар яратдик, бироқ якуний паллада аниқлик ва ўткирлик етишмади», — дея ҳужумчининг сўзларини келтиради Marca.
Унинг қўшимча қилишича, жамоа совуққонликни йўқотмаслиги ва хатолар устида ишлаши зарур:
«Хотиржамлик ва ўзимизга бўлган ишончни сақлаб қолишимиз, нималарни тўғирлаш кераклигини тушуниб, олдинга ҳаракат қилишимиз лозим. Биз турнирни ғалаба билан бошлашни истагандик, аммо ҳозир бирдамликни сақлаб қолиш муҳим», — дея таъкидлади Оярсабаль.
21 июнь куни Испания мусобақанинг иккинчи турида Саудия Арабистонига қарши майдонга тушади.
