Москва ЦСКА клубининг собиқ футболчиси Дмитрий Хомуха Ўзбекистон терма жамоасининг жаҳон чемпионатида Колумбияга қарши ўйиндаги (1:3) мағлубияти ҳақида фикр билдирди.
«Ўзбекистон терма жамоасига нисбатан симпатиям бор. Жамоанинг кўплаб футболчилари Россия чемпионатида ўйнаган. Аббосбек Файзуллаев гол урди. У ЦСКАда яхши из қолдирган, РПЛ вакили бўлган футболчи. Бундан ташқари, бу собиқ СССР таркибида бўлган мамлакат. Мен уларга мухлислик қилдим, дуранг натижани қўлдан чиқариб юборишгани афсусланарли.
Колумбияга қарши ўйин натижаси ҳаққоний бўлди. Жанубий Америка жамоаси мунтазам равишда шундай йирик турнирларда иштирок этади ва катта тажрибага эга. Футболчилар савиясини таққосласак, уларники Ўзбекистонникидан юқорироқ. Терма жамоага кейинги учрашувларда очко тўплашни тилайман.
Ўзбекистоннинг плей-оффга чиқиш имкониятлари сақланиб қолган. Тўрт очко кейинги босқичга чиқиш учун кафолат бўлиши мумкин. Бу вариантни истисно қилиб бўлмайди. Португалияга қарши баҳсда дуранг ўйнаш имкони бор. ДР Конго эса футболда имконсиз нарсанинг ўзи йўқлигини кўрсатди», — деди Хомуха.
Аббосбек Файзуллаев 2023 йил августида ЦСКАга ўтган ва 2025 йил июлигача жамоа шарафини ҳимоя қилган. 22 ёшли футболчи «армиячилар» сафида 72 та ўйин ўтказиб, 8 та гол ва 22 та голли узатма муаллифи бўлган.













