Мадриднинг “Реал” клуби ярим ҳимоячиси Орельен Тчуамени жамоага Жозе Моуриньо бош мураббий этиб тайинланганидан сўнг ўзининг асосий таркибдаги ўрни кафолатланмаганини тушуниб турибди. Агар испан гранди янги трансферларни амалга оширса, франциялик футболчининг “қаймоқранглилар” сафидаги келажаги хавф остида қолиши мумкин.

ТЕАMtalk нашри хабарига кўра, “Манчестер Юнайтед” ҳамда “Ливерпуль” Тчуамени атрофидаги вазиятдан яхши хабардор ва ҳолат ёмонлашган тақдирда, дарҳол унга таклиф жўнатишга тайёргарлик кўрмоқда. Шунингдек, “Арсенал” ва “Челси” ҳам воқеалар ривожини кузатиб бормоқда, бироқ уларнинг қизиқиши нисбатан пастроқ.

Таъкидланишича, “Қироллик клуби” 26 ёшли футболчининг трансфери учун тахминан 100 миллион евро талаб қилади. “Реал” раҳбарияти Тчуаменининг сотувидан тушган пул эвазига Жозе Моуриньо бошчилигидаги жамоани қайта қуриш ишларига сарфламоқчи.

Маълумот ўрнида, ўтган мавсумда франциялик ярим ҳимоячи барча турнирлар доирасида 49 та учрашувда майдонга тушиб, 2 та гол ва 2 та голли узатмага муаллифлик қилди. Футболчининг Мадрид клуби билан амалдаги шартномаси 2028-йилнинг ёзига қадар мўлжалланган. Transfermarkt порталига кўра, унинг ҳозирги бозор қиймати 70 миллион еврони ташкил этади.